Мамлакатни ободонлаштириш ва кӯкаламзорлаштириш Тожикистон Республикаси Ҳукумати олиб бораётган ички сиёсатнинг узвий қисми, асосий йӯналишларидан бири саналади.

Айни кунларда республикамизнинг барча гӯшаларида олиб борилаётган кенг кӯламдаги ободончилик ишлари тожикистонликларнинг давлат бошлиғи олиб бораётган ички сиёсатини тӯла қӯллаб-қувватлашларининг ёрқин намунасидир.

Бу борада Турсунзода ноҳиясининг ватанпарвар меҳнаткашлари ҳам ӯзларининг бор кучу ғайратларини юртимизнинг ободлиги йӯлига йӯналтирганлар.

Ҳозирги пайтда Тожикистоннинг ғарбий дарвозаси саналган Турсунзода шаҳрида ободончилик ва кӯкаламзорлаштириш ишлари жадал суръатларда олиб борилмоқда.

Давлат ҳокимияти Турсунзода шаҳар ижроия органи Атроф-муҳитни ва табиатни муҳофаза қилиш бӯлими ходимларининг фикру зикри кӯкаламзорлаштириш ишларига қаратилган.

Ӯтган ҳафта охирида ташкил этилган шанбаликда мазкур бӯлим ходимлари томонидан Душанбе-Турсунзода автомобил йӯли ёқасига 158 туп манзарали дарахт кӯчатлари ӯтқазишди.

Ноҳиядаги мавжуд қишлоқ жамоатларининг ҳаммасида кӯчат ӯтқазиш мавсумини самарали ӯтказишга алоҳида эътибор берилаётир.

Атроф-муҳит ва табиатни муҳофаза қилиш бӯлими томонидан биргина Жӯра Раҳмонов номли қишлоқ жамоати ҳудудидаги тиббиёт ҳамда таълим муассасалари учун 300 тупдан ортиқ манзарали дарахтлар кӯчатлари етказиб берилди.

Бӯлим ходимлари нафақат ноҳия, балки, Ватанимиз ободлиги йӯлида ҳам ӯз улушларини қӯшмоқдалар. Улар мамлакатимиз пойтахти Душанбе шаҳрида бӯлиб ӯтган кӯчатлар кӯргазмасида ҳам фаол иштирок этдилар.

Ӯтган 2013 йилда ҳам баҳорий бу мавсум кӯнгилдагидек ӯтказилган эди. 1 мартгача ноҳия ҳудудида 88 минг, умумий ҳисобда, 121 минг 401 туп турли кӯчатлар экилган эди. Шуларнинг 15 минг 151 тупи Тожикистон алюминий компанияси улушига тӯғри келади…

Умуман олганда, Турсунзода ноҳияси меҳнаткашлари жорий 2014 йилдаги кӯчат ӯтқазиш масумининг кӯламига эмас, унинг сифатига ҳам жиддий муносабат билдирмоқдалар.

Зеро, обод юртнинг эли хуррам яшайди. У элнинг меҳнатида барака, дастурхонида фаровонлик бӯлади. Ҳаёти тинчу осуда кечади…

А. МИРЗААҲМЕДОВ, «Халқ овози»