Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмон пойтахтнинг Сино ноҳияси Зарафшон маҳалласида «Доноча» хусусий мактабгача таълим муассасаси биносини очди.

Янги икки қаватли замонавий болалар боғчаси маҳаллий тадбиркор томонидан қарийб 4 миллион 900 минг сомоний маблағ эвазига қурилган ва 100 бола учун мўлжалланган.

Болалар боғчасида 35 киши мустақиллик даврининг бахтли фарзандлари тарбияси билан машғул бўлиб, ўртача ойлик маошлари 1500-2000 сомонийни ташкил қилади.

Мазкур хусусий мактабгача таълим муассасаси 19та ётоқ ва ўйнаш хонаси, 1та спорт зали, 80 ўринли мажлислар зали ҳамда битта мусиқа залига эга. Бино ертўласида кир ювиш хонаси ва 3та иш кабинети бор.

Давлат бошлиғи Эмомали Раҳмон болалар боғчаси барча шароитлари билан танишар экан, тадбиркорлар ва қурувчиларга болалар дунёсини безовчи замонавий болалар боғчасини бунёд этганликлари учун юқори баҳо берди. Таъкидлаш жоизки, болалар боғчаси барча мебел, ўйинчоқ ва ёритқичлари болалар дунёсига хос рангларга бўялган.

Болалар ўз шеърлари билан Миллат пешвосига муносиб совғаси учун миннатдорчилик билдирдилар.

Болалар боғчаси очилганидан кейин мамлакат Президенти унинг ёнидан қулай жой танлаб, Она ёдгорлиги билан 1200 ўринли «Меҳри модар» болалар мажмуаси қурилишини бошлаб берди.

Эслатиб ўтиш жоизки, мазкур ташаббус, яъни Аёл-Онага эҳтиром сифатида мажмуа қурилиши Миллат пешвоси муҳтарам Эмомали Раҳмоннинг 2015 йил, 6 март куни Оналар куни муносабати билан анъанавий учрашуви чоғидаги тантанали йиғилишда эълон қилинганди. 

Миллат пешвосининг топшириғига биноан, келгуси авлодни муносиб тарбиялаш мақсадида бутун мамлакат бўйлаб тадбиркорлар томонидан барча зарур шароитлар билан таъминланган замонавий мактабгача таълим муассасалари қурилмоқда.

Жумладан, пойтахтнинг Сино ноҳияси Зарафшон маҳалласида Нусратулло Махсум кўчаси бўйлаб «Доноча» хусусий мактабгача таълим муассасаси ёнида маҳаллий тадбиркорлар Гулчеҳра Гулназарова ва Саиджалол Ғайратовлар томонидан мамлакат Президентининг ташаббус ва тавсияларини қўллаб-қувватлаш йўлида яна иккита хусусий болалар боғчаси қурилаётган бўлиб, уларнинг ҳар бири 130 нафар болага мўлжалланган.

Кўп сонли замонавий мактабгача таълим муассасалар қурилишидан мақсад ўсиб келаётган ёш авлодни ватанпарварлик руҳида тарбиялашдан иборатдир.

«Ховар» ТМАА.