Мамлакатимиз Президенти Эмомали Раҳмонга Брюссел шаҳрида амал қилаётган Халқаро ва стратегик тадқиқотлар Европа маркази академиклари кенгаши қарори билан мазкур марказ фахрий профессори унвони берилди.  

XXI аср башариятни хавотирга солиб, уни ташвишлар «коми»га тортиб борувчи кўнгилсиз воқеалар гирдобига рўпара келиб қолди.

Террорчилик, экстремизм…

Жоҳиллик замиридан ўсиб чиққан, зулумотга йўғрилган бундай ҳаракатлар дунё тинчликсевар ҳамжамиятининг оромини бузди. Унинг осойишта ҳаётига жаҳолат уруғини қадаб қўйди.

Инсоният бугун устувор тинчликка асосланган тотув ҳаёт истайди.

Афсуски, айни пайтда дунёнинг «оловли нуқталари»га айланган Ироқ, Сурия, Миср, Ливан ва Афғонистонда рўй бераётган қонли воқеалар: тинч аҳолининг, хусусан, аёллар ва болалар, қарияларнинг ноҳақ қурбон бўлаётгани, охири кўринмас харобаликлар башариятнинг тинчликка бўлган эҳтиёжини кучайтирди, тинчликнинг бебаҳо неъматлиги исбот талаб қилмайдиган аксиома эканлигини яна бир бор ҳаётий далиллар билан исботлаб турибди…

Бундай кўргуликларнинг азоб-уқубатини Тожикистон халқи ўтган асрнинг 90-йилларида ўз танасида тотиб кўрди.

Ота болага, ака укага қарши турган, қурол ўқталган йиллардаги воқеалар олди олинмаганида, ким билади, дейсиз?!. Оқибат элимиз, юртимиз бошига қандай бадбахтликлар тушарди.

Демак, миллий бирликка асосланган тинчлик кафолатигина Тожикистон халқларини кулфатлар «жари»га қулашдан қутқариб қолди.

Ана шундай мудҳиш лаҳзаларда тақдир тожикистонликлардан меҳрни дариғ тутмади.

- Мен сизларга тинчлик олиб келаман!- дея лафз қилган, тинчликнинг оқил ва жўмард меъморига йўлиқтирди.

Тинчлик ўрнатиш йўлида чекилган беҳисоб заҳматлар, пировард натижаси, ўзининг шириндан-шакар меваларини берди.

Давлатимиз бошлиғи муҳтарам Эмомали Раҳмон олиб борган донишмандона сиёсат ўлароқ у талотумларга барҳам берилди, ўз Ватанининг бир сиқим тупроғига зор, ўзга юртларда қон қақшаб юрган миллионлаб қочоқлар ғарибликнинг балосидан сақлаб қолинди.

Мамлакатимизда олиб борилаётган «очиқ эшиклар» сиёсати бугунги кунда Тожикистоннинг дунё сиёсат майдонида тинчлик ўрнатиш бобида ўз ўрни ва овози, мукаммал тажрибаси борлигини кўрсатди.

Яқинда, мамлакатимизда Миллий бирлик куни байрамининг кенг нишонланиши арафасида Тожикистон Республикаси Президенти Эмомали Раҳмонга Брюссел шаҳрида амал қилаётган Халқаро ва стратегик тадқиқотлар Европа маркази академиклари кенгаши қарори билан мазкур марказ фахрий профессори унвонининг берилиши фикримизнинг ҳаётий далилидир.

Дунёнинг кўзга кўринган сиёсий таҳлилчилари Халқаро ва стратегик тадқиқотлар Европа марказининг Тожикистон Республикаси Президентига берган фахрий профессор унвонига ўз муносабатларини билдириб:- Тинчлик ҳомийсига берилган муносиб унвон, - дея таъкидладилар.

Халқаро ва стратегик тадқиқотлар Европа маркази илмий ходимлари ўтган асрнинг охирларида Тожикистонда ўрнатилган тинчлик жараёнини обдан ўрганиб, атрофлича таҳлил қилиб чиқдилар. Ва бундай тинчлик ўрнатишнинг инсонпарварликка асосланган сиёсий усулини дунё миқёсидаги нодир тажриба, деб баҳоладилар.

Жаҳоннинг тинчлик беқарор бўлган минтақаларида бу тажрибадан фойдаланишни тавсия қилдилар.

Европа Иттифоқи қошида амал қилаётган бу олий сиёсий таҳсил муассасаси 1985 йилда таъсис этилган бўлиб, давлатларнинг Фавқулодда ва Мухтор элчиларига, шунингдек, ёш дипломатларга, Европа Иттифоқи тизимлари ходимларига, НАТО ҳамда бошқа халқаро ташкилотлар намояндаларига сиёсат, халқаро муносабатлар, тараққиёт сиёсати ҳақида олий маълумот берувчи илм даргоҳидир.

Абдуҳафиз МИРЗААҲМЕДОВ, «Халқ овози».