Улуғ Ватан уруши ветеранининг «Барқи Тожик» очиқ ҳиссадорлик холдинг компаниясининг мурожаатномасидан кейинги фикрлари  

Тақдир экан, Улуғ Ватан урушида иштирок этиб, Ватанга соғ-омон қайтганларданман. Фашистлар босқинчиларига қарши курашни Украинадан бошлаб, Прага, Чехословакияда давом эттирдим. Берлин остонасида Буюк Ғалаба нашидасини сурган инсонман.

Ўшанда биз истиқомат қилаётган ҳозирги Рўдакий ноҳиясининг Россия қишлоқ жамоатидан жўда кўплаб йигитлар фронтга бориб, ғалаба билан

қайтишганди. Ҳозир аксари орамизда йўқ. Бугунги кунда бутун жамоат бўйлаб ёлғиз ўзим қолдим…

Колхозимизга сарварлик қилиб, обод этиб кетган Социалистик Меҳнат Қаҳрамони Ҳомиджон Назаров, Абдуфаттоҳ Отаназаров, Ўғилхон Деҳқонова, Ҳалимахон Ширинова каби фронт ва фронт ортида халқимизга хизмат кўрсатган кишиларнинг элу юрт учун қилган хизматлари, қарийбки, ҳар даврада эсланади, қадрланади.

Нима демоқчиман? Демоқчиманки, халқ ўз қаҳрамонларини ҳеч қачон унутмайди! Ҳа, шундай.

Мен икки – социалистик ва демократик тузумларни ўз кўзи билан кўрган кишиман. XX аср бошларида мамлакатни индустриялаштириш электрификациялаштириш жараёнларига бевосита гувоҳ бўлганман. Ўшанда, ГОЭЛРО деган режа тузилиб, бутун Шўролар Иттифоқини электрлаштиришга киришилганди. Ушбу режа асосида бутун Шўролар мамлакатида ягона электр тизими вужудга келганди.

Худога минг шукрки, бугунги кунда мустақил ва демократик, ҳуқуқбунёд тузумда яшаётган азиз Ватанимиздаги улкан бунёдкорлик ишларининг ҳам гувоҳи бўлиб турибман. Тинчлик ва миллий бирлик асосчиси –Миллат пешвоси муҳтарам Президентимиз Эмомали Раҳмон Жаноби олийлари бошчилигида олиб борилаётган яратувчанлик ишлари, айниқса, Президентимизнинг мамлакатни энергетик мустақилликка эриштириш йўлидаги саъй-ҳаракатлари натижасида жуда улкан ишлар амалга оширилди. Ушбу бунёдкорлик ишларига, нафақат, мен, балки барчамиз гувоҳ бўлиб турибмиз.

Электр тармоқларини инсон вужудидаги қон томирига ўхшатишади. Зотан, томирда қон айланмас экан, оқибати нима билан тугаши барчага аён. Шу боис, мамлакат бўйлаб электр энергиясини етказиб берувчи линиялар ўта муҳимлигини англаган муҳтарам Президентимиз Эмомали Раҳмон бошчилигидаги республика Ҳукумати 500 киловолтлик «Жануб-Шимол», 220 киловолтлик «Лолазор-Хатлон» линияларини ишга туширди. Шунингдек, 500 киловолтлик «Жануб-Шимол» электр линияси қурилиб, мамлакат пойтахтини Суғд вилояти билан боғловчи Ягона электр тизими яратилди!

Ана шу бунёдкорликлар натижасида, мана, иккинчи йилдирки, мамлакатимиз аҳолиси электр энергияси танқислигини сезмаяпти. Тўғри, ўтган йили бироз чеклов амал қилиб, муддатидан илгари олиб ташланганди. Бу йил эса, «Барқи Тожик» очиқ ҳиссадорлик холдинг компанияси мамлакат аҳолисига Мурожаатнома билан чиқиб, бу йилги қишки мавсумда электр узатиш масаласидаги чеклов олиб ташланганлигини хабар қилди. Бу хабардан барча қатори мен ҳам суюндим. Бу нимадан далолат беради? Бу, мамлакатимизда «Сангтўда-1», «Сангтўда-2», «Помир-1» каби ГЭСлар қурилиши ортидан эришилган энергетик мустақиллик, демакдир.

Мана, уйимиз, кўчаларимиз, ҳовлимиз чароғон. Ана шундай кунларга етказганига беҳисоб шукрлар бўлсин. Кези келганда бир нарсани таъкидлаб ўтмоқчиман. Азизлар, бугунги кундаги мўл-кўл электр энергиясини ишлатишда ҳаргиз исрофгарчиликка йўл қўйманг. Зотан, урфиятда: -Денгиз бошида ўтирсанг ҳам сувни исроф қилма, - дейишади. Шу боис, Парвардигорнинг сизу бизга ато қилган ушбу неъматидан фойдаланишда тежамкор бўлсак, албатта, баракаси зиёда бўлади. Сўзим охирида кўпни кўрган кекса бир отахон сифатида дунё тинч, мамлакатимиз обод, хонадонларимиз чароғон бўлсин, дея дуо қиламан.

Мирзараҳмат МЕЛИЖОНОВ,

Рўдакий ноҳияси, Россия қишлоқ жамоатининг Чилмеҳроб маҳалласи, Улуғ Ватан уруши ветерани.