Миллат пешвосининг муқаддас Рамазон ойи кириб келиши муносабати билан йўллаган табриги

26 май 2017 йил, Душанбе шаҳри.

Азиз ватандошлар!

Эртага муқаддас Рамазон ойи – сабр-тоқат, чидамлилик, матонату парҳезкорлик фурсати етади.

Шу муносабат билан барчангизни табриклаб, ушбу муқаддас ойда ҳар

бирингизнинг оилангизга қут-барака ва хотиржамлик тилайман.

Турли дин ва оқимлар, айниқса, муқаддас Ислом дини издошлари учун Рамазон рўзаси руҳнинг вужуддан устунлиги, ёмон амаллардан тийилиш маъносини англатади.

Рўза иродани мустаҳкамлашдан ташқари, инсонни ҳаққонийлик, хушкорлик ва, умуман, яхши амалларни бажаришга ундайди.

Шунинг учун, муқаддас Ислом динининг асосларидан бири ҳисобланган муборак Рамазон ойининг рўзаси нафсни тийишнинг мукаммал шакли ҳисобланади.

Муборак Рамазон ойи ва рўза тутиш эзгу ва яхши ишларга қўл уриш, жумладан, эҳтиёжмандларга ёрдам бериш даври саналади.

Яқинлар ва атрофдагиларга илтифотли бўлиш, ҳолдан тойганларга қўл чўзиш, имкон қадар етимлар, ногиронлар, камтаъминланган оилалар, қаровчисиз қолган кишиларга ёрдам бериш, ҳар қандай номаъқул амаллардан тийилиш, яхши муомала, илиқ муносабат, ўзини яхши тутиш ва бошқа ўнлаб инсоний қадриятларга амал қилишнинг зарурлиги бу муқаддас ойда эътироф этилган.  

Бундан ташқари, саховату ҳимматлилик, эзгу ва муносиб амалларга қўл уриш, шунингдек, исрофгарчиликлар ва дабдабали тадбирлару маросимлар ўтказишдан тийилиш муқаддас Ислом динида муҳим амаллардан ҳисобланади.

Бу масала Аллоҳнинг самовий китобида ҳам қайд қилинган: «Ҳаддан ташқари исрофгарчилик қилма. Ҳақиқатдан ҳам, исрофгарлар – шайтоннинг биродарларидирлар».

Шу сабабли, фитр садақаси жамиятнинг эҳтиёжманд қатламини қўллаб-қувватлашнинг муҳим йўлларидан бири эканлигини таъкидлаш жоиздир.

Рўза эҳсони ёки фитр садақасини биз бойлар ва мулкдорлар, уламолар ва диний арбобларга эмас, балки эҳтиёжмандлар, етимлар ва ногиронларга беришимиз, бу ишда ҳам исрофгарчиликка йўл қўймаслигимиз керак.

Яъни эҳтиёжмандлар ва камтаъминланганларга эътибор рўзанинг муҳим асосларидан бири ҳисобланади. Агар мол-мулкка эга бўлган кишилар бундай кишиларга муҳаббат ва илтифотларини кўрсатишиб, етимларни тарбиялаш, кишилар муаммо ва мушкулликларини ҳал этиш каби эзгу ишларга башардўстона ҳиссаларини қўшишга интилсалар, жамият аъзолари орасида дўстлик, муҳаббат, шаффофлик ва самимият туйғулари ҳукмрон бўлади ва мустаҳкамланади.

Шунингдек, бирорта аҳоли нуқтасига сув келтириш, мактаб ёки тиббий муассаса қурилиши ёки таъмирланиши, йўл участкаларини қайта тиклаш ва бошқа шу каби эзгу амаллар одамлар мушкулликларини анча енгиллаштиради.

Жорий йилги Рамазон ойи азиз ватандошларимиз учун ҳам эзгу ишларни амалга ошириш онларига айланишига ишонч билдирган ҳолда, мамлакатимизнинг барча халқларини муборак Рамазон ойи кириб келиши муносабати билан яна бир марта табриклайман ҳамда Ватанимизнинг ҳар бир фуқаросига оилавий фаровонлик, қут-барака, саломатлик, олийҳимматлилик ва бахту саодат тилайман.

Муқаддас Рамазон ойи сайёрамиз ва мамлакатимизнинг ҳар бир оиласида тинчлик, барқарорлик, хотиржамлик ва фаровонлик мустаҳкамланишига ҳисса қўшсин.

Муқаддас Рамазон ойи қутлуғ бўлсин, азиз юртдошлар!

«Ховар» ТМАА.