Давлат ҳокимияти Панж ноҳияси ижроия органи хотин-қизлар ва оила билан ишлаш бўлими бошлиғи Қундузой Усмонованинг маълум қилишича, ноҳияда 50 нафардан зиёд бекор ва ишсиз юрган аёлларга «Бонувони Панж» жамият ташкилотида ҳунар ўргатиляпти.

Аёллар ҳозир тикувчилик ва тўқиш касбини эгаллаш бепул курсларида таҳсил олишмоқда.

-Аёллар ва қизларни ўқиш ва касб ўрганишга жалб қилганмиз, - деди суҳбатда ноҳия ҳукумати хотин-қизлар ва оила билан ишлаш раҳбари Қундузой Усмонова. - Ҳозир бу ерда 50 нафардан зиёд хотин-қизлар тўқимачилик ва тикувчилик касбларини ўрганмоқда. Белгиланган режамизга кўра, ишсиз аёлларни «Бонувони Панж» жамият ташкилотида ҳунар ўрганишга жалб этишни мақсад қилиб қўйганмиз. Ўқишни тугатганлар иш жойлари билан таъминланади.

ЗАМОНАВИЙ  МУЗЕЙ

Ноҳия ўрта умумтаълим муассасаларида янги музейлар ташкил қилинганди. Бир йил илгари 25-ўрта умумтаълим муассасасида тарих фани ўқитувчиси, Тожикистон маорифи аълочиси Маҳмадулло Зокиров ташаббуси билан марҳум шоир, Тожикистон Ёзувчилар иттифоқи аъзоси, ўнлаб шеърлар китоби муаллифи Зайниддин Жомий музейи очилганди. Музейдан шоирнинг суратлари, китоблари, қўлёзмалари, мактублари, таржималари, кийимларидан иборат бўлган жами 500 экспонат ўрин олган.

Яқинда эса, 27-ўрта умумтаълим муассасасида янги музей ўз эшикларини томошабинлар учун очди. Музей тарих фани ўқитувчиси Абдуқодир Олимов, ўқитувчилар, ўқувчилар, ота-оналар ёрдамида очилган. Ушбу музейда ўнлаб экспонатлар қўйилган бўлиб, томошабинлар катта таассурот олишади. Ҳозирги пайтда ноҳиядаги 4 ва 12-умумтаълим муассасаларида музейлар ишлаб турибди.

САХОВАТЛИ  КИШИ

Озодагон қишлоқ жамоатидаги Содиқ Солеҳов қўли очиқ, саховатли кишилардан бири ҳисобланади. У нафақасини тўплаб,  ёрдамга эҳтиёжи бўлган Меҳвар Файзуллоева, Раҳима Алиева, Раъно Алиевага 50-100 сомонийдан, ноҳиядаги 3-болалар муассасаси (боғчаси) тарбияланувчиларини бир кунлик озиқ-овқат маҳсулотлари билан таъминлади.

Нафақахўр Содиқ Солеҳов каби сахий инсонларнинг ташаббусини ноҳия ҳукумати томонидан қўллаб-қувватланди ва унга миннатдорчилик баён этилди.

Жайлов Ҳасанов, Панж ноҳияси.