Вилоят раҳбари Давлатшоҳ Гулмаҳмадзода Япониянинг «Cokey Systems Co., Ltd» компанияси вакилларини қабул қилди. Учрашувда, шунингдек, «Аввалин» ёпиқ шаклли ҳиссадорлик жамияти бошлиғи Манучеҳр Гадоев ҳамда мазкур корхона раҳбари Нажиб Ҳамроев қатнашди.

Учрашув чоғида компаниянинг Хатлон вилоятидаги фаолиятини келгусида ривожлантириш масаласи муҳокама қилинди.

Айниқса, қизилмия илдизини қайта ишлаш бўйича ҳамкорликка жиддий эътибор қаратилди.

Вилоят раҳбари қизилмия етиштириш ҳамда унинг илдизини қайта ишлаш юзасидан ҳамкорликнинг муҳимлигини таъкидлаб ўтди. «Яқин келажакда қизилмия илдизидан тайёрланадиган якуний маҳсулот маҳаллий тамға билан ишлаб чиқарилишига эришмоқ зарур», - деб қайд этди Д. Гулмаҳмадзода.

Япония компанияси вакиллари номидан компания маслаҳатчиси Казуко Мотомура ҳамда қизилмия илдизидан маҳсулот ишлаб чиқариш лойиҳаси раҳбари Жунжи Банлар, корхона нафақат қизилмия илдизини қайта ишлаш, балки махсус плантацияларда қизилмия етиштириш билан ҳам шуғулланаётганлигини таъкидлаб ўтишди.

Эслатиб ўтамиз, Хатлон вилояти Қабодиён ноҳиясида «Аввалин» ЁШҲЖ қизилмия етиштириш ҳамда унинг илдизини қайта ишлашни йўлга қўйган. Япониянинг «Cokey Systems Co., Ltd» компанияси Марказий Осиё, Россия ва Хитойда ўз бўлимларига эгадир. Тожикистонда компанияни «Аввалин» корхонаси тақдим этмоқда. Бу корхона қизилмия илдизини бирламчи қайта ишлаш билан шуғулланмоқда.

Тиб ходимлари билан учрашув

Давлат байроғи куни арафасида Қўрғонтепа шаҳрининг Б. Воҳидов номли вилоят касалхонасида капитал таъмирдан сўнг, юрак хасталиклари бўлими фойдаланишга топширилди.

Беморхона ходимлари олдида сўзга чиққан вилоят раиси Давлатшоҳ Гулмаҳмадзода йиғилиш иштирокчиларини Давлат байроғи куни муносабати билан табриклади.

- Давлатимиз бошлиғи Эмомали Раҳмон саъй-ҳаракатлари натижасида вилоятимизда кўплаб тиб муассасалари қурилиб фойдаланишга топширилди, - деди Д. Гулмаҳмадзода. – Тиб муассасалари, айниқса, замонавий тиббиёт технологиясининг энг сўнгги ютуқлари билан жиҳозлантирилишига катта эътибор берилмоқда.

Йиғилишда қайд этилишича, мазкур бўлим таъмири учун давлат бюджетидан маблағ ажратилган. Таъмир ишлари замонавий стандартлар асосида бажарилган бўлиб, бўлим барча зарурий ускуналар билан таъминлангандир.

Озиқ-овқат хавфсизлигига қаратилган лойиҳалар

Вилоят раиси Давлатшоҳ Гулмаҳмадзода АҚШнинг халқаро тараққиёт бўйича агентлиги – USAIDнинг Тожикистондаги бошлиғи Кетлин Макдоналд билан учрашди.

Мулоқот жараёнида Д. Гулмаҳмадзода вилоят ижтимоий-иқтисодий тараққиёти тўғрисида сўзлади.

- Сўнгги йилларда ишлаб чиқариш кўрсаткичлари ошиб бораётганлиги яққол кўзга ташланади, - деди вилоят раиси. – Соғлиқни сақлаш соҳаси тараққиётига жиддий эътибор берилмоқда. Айниқса, тиббиёт муассасаларини замонавий ускуналар билан таъминлаш яхши йўлга қўйилган. Шунингдек, қишлоқ хўжалик соҳаси ҳам жадал суръатларда тараққий этмоқда. Вилоятнинг чекка қишлоқлари аҳолисини ичимлик суви билан таъминлаш йўналишида ҳам кўпгина ишлар бажарилган.

Ўз навбатида, К. Макдоналд АҚШнинг халқаро тараққиёт бўйича агентлиги айни пайтда жамиятнинг тараққиётига хизмат қиладиган турли йўналишларда лойиҳаларни амалга оширишга қаратилган фаолиятни йўлга қўйганлигини таъкидлаб ўтди.

Шунингдек, яқин келажакда вилоятда озиқ-овқат хавфсизлигига қаратилган иккита янги лойиҳа доирасида ишлар ҳам йўлга қўйилиши таъкидланди. Бу лойиҳалар 2020 йилгача мўлжалланган бўлиб, вилоятнинг 12 ноҳиясини қамраб олиши кўзда тутилган. Томонлар бу лойиҳалар доирасида ўзаро яқиндан ҳамкорлик қилиш ҳақида келишиб олдилар.

Ўз мухбир.