Тожикистон Республикаси Ҳукумати қошидаги Ёшлар, спорт ва сайёҳлик комитети ташаббуси билан Балжувон ноҳиясида «Тарихий-маданий ёдгорликлар, шифобахш булоқлар сувлари, тоғли минтақалардан самарали фойдаланиш ва Балжувон ноҳиясида замонавий хизмат кўрсатишни йўлга қўйиш» мавзусида таълимий семинар ўтказилди. Бу тадбирда сайёҳлик ширкатлари, комитет маҳаллий тузилмалари вакиллари ва ишбилармонлар қатнашди.

Семинар қатнашчилари ноҳияда янги сайёҳлик йўналишларини яратиш, сайёҳлар учун совғалар тайёрлаш ҳамда бу ерга маҳаллий ва хорижий сайёҳларни жалб қилиш йўллари тўғрисидаги фикрларини баён этишди. 

Семинар охирида унинг иштирокчилари ноҳия халқ ҳунармандчилиги намойиши ҳамда сайёҳлик минтақаларини кўришди.

Балжувон ноҳияси ўзининг гўзал ва нотакрор табиати билан хорижий сайёҳлар диққатини жалб этиб келмоқда. Шунинг учун ҳам, бу минтақа мамлакат Ҳукумати қарори билан сайёҳлик мавзеси, деб эълон қилинган.

Ёвон ноҳияси тараққиёти

Жорий йил биринчи ярим йиллигида Ёвон ноҳияси қурувчилари 52 миллион 343,3 минг сомонийлик қурилиш ва пайвандлаш ишларини бажаришди. Бу муддат давомида 14 та хизмат кўрсатиш ва маиший, соғлиқни сақлаш, истироҳат, маданий, кўпқаватли турар-жойлар, техника таъмирига мўлжалланган иншоотлар қурилиб, фойдаланишга топширилди. Яна ўнлаб иншоотлар қурилиши тез суръатлар билан давом эттирилмоқда.

Эслатиб ўтиш жоизки, «Хаучин Ғаюр Индустриал» Масъулияти чекланган жамиятининг гажкартон ишлаб чиқариш корхонасида қурилиш ишлари талаб асосида йўлга қўйилган бўлиб, ишлаб чиқариш ускуналари тўлиқ корхонага келтирилган. Бу корхона қурилиши якунланиш арафасида. Айни пайтда корхонада 165 нафар киши меҳнат қилади, жумладан, уларнинг 90 нафари маҳаллий аҳоли вакиллари ва 75 нафари хитойликлардир.

Қишлоқ аҳли сув билан таъминланди

Норак шаҳри Дўконий қишлоқ жамоатининг USAID ташкилоти билан ҳамкорлигида қишлоқ аҳолисини сув билан таъминлаш лойиҳаси доирасида Хожаабдолон қишлоғига ичимлик суви қувури тортилди. Сув қувурининг узунлиги 7000 метрдан иборат бўлиб, баланд  тоғда жойлашган булоқлардан қишлоққа тортилган. Айни пайтда қишлоқ аҳли тўлиқ ичимлик суви билан таъминланди.

Уруш фахрийларига ёрдам

Тожикистон Республикаси Президенти Эмомали Раҳмон топшириғига биноан, Истиқлолият байрами арафасида М. С. А. Ҳамадоний ноҳиясининг Япония милитаристларига қарши уруш иштирокчиларига бир вақтлик пул ёрдами кўрсатилди.

Ноҳияда бу жанг қатнашчиларидан 4 нафар ҳаётдир. Уларга ёрдам пулини республика, Хатлон вилояти Кўлоб минтақаси Уруш ва меҳнат фахрийлари кенгаши вакиллари  ҳузурида ноҳия Уруш ва меҳнат фахрийлари кенгаши раиси Шариф Раҳимов топширди.

Ногиронлар тикувчи бўлишди

Ҳамадоний ноҳияси «Равонбахш» ногиронлар жамият ташкилоти билан ҳамкорликда БМТнинг Тараққиёт дастури ноҳияда амалга оширилмоқда.

- Бу дастур томонидан ажратилган маблағ ҳисобидан ноҳиянинг камтаъминланган оилаларидан бўлган 25 нафар ногирон аёлга тикувчилик касби ўргатилди, - деди «Равонбахш» жамият ташкилоти раҳбари Зайнулло Муродов. – Айни пайтда улар ўз тикувчилик машиналари билан ишламоқдалар.

Маълум бўлишича, яқинда БМТ Тараққиёт дастури вакиллари касб ўрганган аёллар аҳволидан хабар олиб, уларни тикувчилик машиналари билан таъминлашга ваъда беришган.

Шунингдек, ноҳиянинг Даштигуло қишлоқ жамоати Файзобод қишлоғида аёллар фаолияти учун бино ажратган бўлиб, айни пайтда таъмирдан чиқарилган ва унда «Равонбахш» жамоат ташкилоти идораси ҳам жойлашган.