Мамлакат Бош вазири ўринбосари Азим Иброҳим иш сафари билан Суғд вилоятига ташриф буюрди.

Вилоят ижроия органида бош вазир ўринбосари ва вилоят раиси ҳузурида иш кенгаши чақирилиб, унда куннинг муҳим, жумладан, сув тортиш насосларининг ҳолати ва уларни электр энергияси билан таъминлаш масалалари муҳокама этилди.

Бош вазир ўринбосари Азим Иброҳим мамлакат Ҳукуматининг уч стратегик мақсади: энергетик мустақилликка эришиш, коммуникацион тангликдан чиқиш ва озиқ-овқат хавфсизлигини таъминлашнинг амалга ошиши бир-бири билан боғлиқлигини айтиб, шунинг учун ҳам, вилоят қишлоқ хўжалиги соҳасида сув танқислигини ҳал этиш куннинг долзарб масалаларидан эканлигига урғу берди.

Азим Иброҳим Суғдга сафари давомида вилоят саноат корхоналари раҳбар ва  вакиллари билан ҳам кенгаш ўтказиб, муаммолар юзасидан мулоқот ўтказди.

БУЮК ҒАЛАБА МУНОСИБ НИШОНЛАНДИ

Суғд вилоятида фашизм устидан қозонилган Ғалабанинг 70 йиллиги кенг нишонланиб, барча шаҳру ноҳияларда тантанали тадбирлар ташкиллаштирилди.

Хўжанд шаҳри марказидаги Улуғ Ватан урушида қурбон бўлганлар хотирасига ўрнатилган ёдгорлик ёнида тантанали маросим ташкил этилди.

Тадбирда иштирок этган вилоят раиси Абдураҳмон Қодирий ғалабанинг қўлга киритилишида тожикистонлик жангчиларнинг ҳиссаси катталиги ҳар биримиз учун фахрли эканлигини таъкидлади.

Ушбу маросимда уруш ва меҳнат фахрийлари, вилоят зиё аҳли, олий, ўрта махсус ва ўрта умумтаълим муассасалари ўқитувчи-талабалари ва бошқалар иштирок этиб, уруш қурбонлари хотирасига ўрнатилган ёдгорлик пойига гуллар қўйишди.

Шунингдек, байрам кунлари Суғд вилоятида яшаётган 242 нафар Улуғ Ватан уруши иштирокчилари ҳолидан хабар олиниб, моддий ёрдам кўрсатилди.

Ҳар бир уруш иштирокчисига мамлакат Президенти номидан 1500 ва вилоят раиси томонидан 1000 сомонийдан маблағ берилди.

ЕХҲТ ВАКИЛЛАРИ БИЛАН МУЛОҚОТ

Европада Хавфсизлик ва Ҳамкорлик Ташкилоти (ЕХҲТ)нинг Хўжанд шаҳридаги бўлими вакиллари мазкур ташкилотнинг Тожикистондаги катта мутахассиси Шон Мак Гриви бошчилигида вилоят раиси Абдураҳмон Қодирий билан учрашди.

Мулоқот аввалида А.Қодирий вилоят ижроия органининг Европада Хавфсизлик ва Ҳамкорлик Ташкилоти билан ҳамкорлиги хусусида тўхталиб ўтиб, келгусида муносабатлар янада зич бўлишига умид билдирди.

А.Қодирий меҳмонларга вилоят халқ хўжалигида кейинги йилларда эришилган ютуқлар тўғрисида атрофлича маълумот берди.

Мулоқот давомида Шон Мак Гриви Европада Хавфсизлик ва Ҳамкорлик Ташкилотининг Хўжанд шаҳридаги бўлими янги раҳбари Шанджив Тиручелвамни таништирди.

Маълумки, давлат ҳокимияти Суғд вилояти ижроия органи мазкур ташкилот билан яқиндан ҳамкорлик қилиб келади.

Унинг вилоятдаги вакиллиги янги раҳбарлари билан ҳамкорликлар давом этишига ҳар икки тараф ҳам ишонч билдирди.

Ўз мухбир.