Б. Ғафуров ноҳияси Ҳайдар Усмон жамоатида “Дугонаҳо” номи билан атласу адрас тўқишни ўргатиш таълим маркази иш бошлади.

Марказда 20 та адрас тўқиш ускунаси ва 15 та чок тикиш машинаси ўрнатилган бўлиб, бу ерда 60 нафар маҳаллий хотин-қиз касб ўрганиш билан машғул бўлишади.

Марказнинг очилиш маросимида иштирок этган вилоят раиси жорий йил давомида вилоят шаҳру ноҳияларининг барча жамоатларида шундай касб ўрганиш марказлари ишга туширилиб, бу йўналишда 9 минг нафар аёл касб эгаси бўлишини таъкидлади.

Қайд этиш жоизки, мазкур марказдаги барча ускунаю машиналар вилоят ижроия органи томонидан бепул тақдим этилган. Бу ерда уч ой давомида аёлларга атлас ва адрас тўқиш сирлари ўргатилади.

ФУҚАРОЛАР ҚАБУЛИ

Бир неча йилдирки, мамлакат Президентининг кўрсатма ва топшириқлари асосида мансабдор шахслар мунтазам равишда фуқаролар қабулини ўтказиб келади.

Ўтган ҳафта Суғд вилояти раиси Абдураҳмон Қодирий 80 кишини қабул қилди. Хўжанд шаҳридан 9, Бобожон Ғафуров ноҳиясидан 6, Спитамендан 22, Мастчоҳдан 14, Ғончидан 11, Зафарободдан 5, Истаравшандан 4, Тоғли Мастчоҳдан 3, Панжакентдан 3, Исфарадан 3, Истиқлол шаҳри ва Ашт ноҳиясидан бир киши ўз арзу шикояти, таклифу мулоҳазалари билан вилоят раисига мурожаат қилди.

Фуқаролар, асосан, ер ва унга боғлиқ баҳсли масалалар, ҳуқуқ ҳимояси, қурилиш, сув танқислиги ҳамда соғлиқни сақлаш соҳасидаги етишмовчиликлар каби долзарб муаммолар билан мурожаат этишди.

ҚЎШМА КОРХОНА ФАОЛИЯТИ МУҲОКАМАСИ

Суғд вилояти раиси Абдураҳмон Қодирий ва “Тожикистон-Хитой тоғ саноати” қўшма корхонаси раҳбари Хуан Сян Жун ҳамда ширкатнинг ижроия директори Эн Джи Сай учрашиб, мазкур корхона фаолиятини муҳокама этишди.

Вилоят раиси матбуот хизматидан хабар берилишича, ширкат раҳбари корхонанинг бугунги фаолияти тўғрисида муфассал маълумот бериб, хитойлик мутахассислар томонидан ишлаб чиқариш иқтидорини ошириш ва маҳсулот ҳажмини кўпайтиришга доир аниқ тадбирлар амалга оширилишини таъкидлади.

Ҳозир Тожикистон ва Хитой тоғ саноати ширкатининг қазилма бойликларни қайта ишлаш корхонаси Зарнисор (собиқ Олтинтопган) шаҳарчасида фаолият юритяпти. Бу ерда 1100 дан ортиқ киши доимий иш ва яхши маош билан таъминланган.

Жаноб Эн Джи Сай жорий йил корхона жиҳозлари ва автомобиллар учун эҳтиёт қисмлари ишлаб чиқарувчи янги корхона қурилиши ҳамда аккумулятор ишлаб чиқариш корхонаси ташкил этилиши  лойиҳалари учун Хитой давлати ишбилармонларининг маблағлари йўналтирилишини билдирди.

Суҳбат чоғида Истиқлол шаҳрида металлургия комбинати қурилиши ҳам муҳокама этилди. “Тожикистон-Хитой тоғ саноати ширкати” металлургия комбинати бир йилда 50 минг тонна қўрғошин ва 50 минг тонна рух ишлаб чиқариш қувватига эга бўлади. Корхона 2017 йилнинг бошида ишга туширилиши режалаштирилган.

Ўз мухбир.