Қўрғонтепа шаҳрида вилоят раиси ўринбосари Умед Зоҳирзода раҳбарлигида Қишга тайёргарлик ва уни ўтказиш штабининг навбатдаги йиғилиши бўлиб ўтди. Мажлисда вилоят шаҳар ва ноҳиялари штаблари бошлиқлари иштирок этишди.

Йиғилишда Тожикистон Республикаси Ҳукуматининг «2017-2018 йиллар кузги-қишки мавсумида республика иқтисодий ва ижтимоий соҳаларини

мунтазам фаолият учун ўз вақтида тайёрлаш тўғрисида»ги қарорига эътибор қаратилди.

Вилоят иқтисодий ва ижтимоий соҳаларининг 2017-2018 йиллар қишки мавсумига тайёргарлик ҳолатини назорат қилиш бўйича ишчи гуруҳи бошлиқлари Ш. Маҳмадалиева ва Т. Исматова бажарилган ишлар юзасидан ҳисобот беришди.

- Вилоят барча шаҳар ва ноҳияларида кўмир, ўтин, дизел ёнилғиси, озуқа, чорва учун дағал хашак ва ем етарлича захира қилинган, - деди вилоят раиси ўринбосари У. Зоҳирзода.

У йиғилиш қатнашчиларига ферма ва кашарларни таъмирлаш ҳамда тиклаш, саноат корхоналарининг мунтазам фаолиятини таъминлаш, фойдаланилган электроэнергия ва газ маблағларини ўз вақтида жамғариш ишларига эътибор қаратиш лозимлигини уқтириб ўтди.

Данғарада янги корхона

Хатлон вилояти раиси Давлатшоҳ Гулмаҳмадзода иштирокида Данғара ноҳиясида чорва ва парранда учун озуқа тайёрлаш заводи ишга туширилди.

Мазкур корхона вилоятда ягонадир. Корхона маҳсулоти чорвачилик, айниқса, паррандачилик соҳасидаги мавжуд муаммолар ечимига хизмат қилиши, табиий. Ноҳияда озуқа хом ашёси етарли бўлиб, заводнинг мунтазам фаолият қилиши учун кенг имкониятлар мавжуд. Бу ҳақда давлат ҳокимияти Хатлон вилояти ижроия органи ахборот-таҳлил бўлимидан хабар беришди.

Стипендиатлар билан учрашув

Тожикистон Республикаси Футбол федерацияси раиси Рустами Эмомалининг қўллаб-қувватлаши билан Хатлон вилоятидан Президент стипендияларини олувчи талабаларнинг учрашуви Қўрғонтепа шаҳридаги Тиббиёт коллежида бўлиб ўтди.

Учрашувда Хатлон вилояти раиси ўринбосари Махфират Хидирзода, Тожикистон Республикаси Ҳукумати қошидаги Ёшлар ва спорт комитети раиси Аҳтам Абдуллозода ҳамда вилоят Ёшлар ва спорт бошқармаси бошлиғи Жамолиддин Исматуллозода иштирок этди.

Учрашув жараёнида Тожикистон Республикаси Президенти стипендиясини олувчи талабаларга шаҳодатнома ва пул мукофотлари топширилди.

Айни пайтда Хатлон вилоятида 108 нафар талаба Тожикистон Республикаси Президенти стипендиясини олади. Вилоят раиси стипендиясини олувчи ёшлар 35 нафарни ташкил этади. Бундан ташқари, 521 нафар талаба шаҳар ва ноҳиялар раислари стипендиясини олмоқда.

Кузги ғалла экиш бўйича семинар

Восе ноҳияси Гулистон қишлоқ жамоатидаги Олимтой минтақасида «Кузги ғалла экишнинг замонавий технологияси» мавзусида минтақавий семинар-йиғилиш бўлиб ўтди. Семинар Тожикистон Республикаси Қишлоқ хўжалиги вазирлиги, Тожикистон Республикаси Қишлоқ хўжалиги фанлари академияси ҳамда давлат ҳокимияти Хатлон вилояти ижроия органининг биргаликдаги ташаббуслари билан ўтказилди.

Семинар-йиғилишда Тожикистон Республикаси Бош вазири ўринбосари Маҳмадтоир Зокиров, Қишлоқ хўжалиги вазири Иззатулло Сатторий, Хатлон вилояти раиси Давлатшоҳ Гулмаҳмадзода, вилоят ноҳиялари раислари иштирок этишди. Тадбир қатнашчилари мазкур мавзу юзасидан фикр ва тажриба алмашишди.

Ўз мухбир.