Халқаро болаларни ҳимоя қилиш кунига бағишлаб Қўрғонтепа шаҳрида кўпсонли болалар ва ўсмирлар иштирокида байрам дастури бўлиб ўтди. Мазкур тадбир доирасида ёш рассомлар, энг яхши ихтирочилар танлови, велосипедчилар ва ёш ҳайдовчилар пойгаси ўтказилди. Унда шаҳар болалари иштирок этиб, ўз маҳорат ва истеъдодларини намойиш этишди.

Байрам тадбирида вилоят раисининг ўринбосари Махфират Хидирзода ва Қўрғонтепа шаҳри раҳбарияти қатнашиб, фаол иштирок этганларга хотира совғалари топширди.

- Болалар ва ўсмирлар бизнинг келажагимиз бўлиб, уларнинг таълим ва тарбияси учун мамлакатимизда барча шароитлар муҳайё этилган, - деди М. Хидирзода. – Бугун болалар, айниқса, етим ва қаровчисиз қолган гўдаклар ҳимояси ҳамда тарбиясига катта ғамхўрлик зоҳир этилмоқда.

Шунингдек, вилоят раиси ўринбосари ногирон болалар билан учрашиб, уларга турли совғалар топширди.

Тадбир сўнггида байрам концерт дастури намойиш этилди.

Кутубхоналарнинг ягона тармоғи

Кўлоб шаҳридаги Шамсиддин Шоҳин номли вилоят кутубхонаси ташаббуси билан кутубхоначилар учун вилоят семинари ўтказилди.

Давлат ҳокимияти Хатлон вилояти ижроия органи Ахборот-таҳлил бўлимидан хабар беришларича, мазкур семинар кутубхона соҳасининг раҳбарлари ҳамда замонавий технологиялар билан ишлайдиган ёш мутахассислари иштирокида «Интернет тармоғига уланиш, анъанавий кутубхоналар фаолиятини шакллантириш ва марказий кутубхоналар қошида электрон кутубхоналарни йўлга қўйиш» мавзусида бўлиб ўтди.

Манбанинг маълум қилишига кўра, бундан сўнг анъанавий кутубхоналар электрон кутубхоналар билан фаолиятларини муштарак ҳолда сайқаллаштирадилар.

Семинарда 50 нафар кутубхоначи ва вилоят Маданият бошқармасининг Кўлоб минтақасидаги вакили иштирок этиб, ўзларининг фойдали маслаҳатлари билан ўртоқлашдилар.

Чегарачилар билан учрашув

Хатлон вилояти раиси ўринбосари Махфират Хидирзода ва бир гуруҳ аскарлар оналари Фархор ноҳиясида жойлашган ҳарбий қисмлардан бирига ташриф буюришди. Улар аскарларнинг яшаш шароитлари билан танишиб чиқдилар. Сўнгра оналар байрам дастурхони тузаб, ҳарбий қисм хизматчиларини чегарачилар куни билан қутлашди. Учрашув сўнггида концерт дастури намойиш этилди.

Мазкур ҳарбий қисмда хизмат қилаётган аскарлардан бирининг онаси барча оналар номидан фарзандларининг ҳарбий бурчларини ўташлари учун қулай шароитлар яратилганлиги боис миннатдорчилик изҳор этди:

- Биз учун фарзандларимизнинг армияда хизмат қилишлари ва она-Ватан ҳамда эл осойишталигини ҳимоя этишлари катта шарафдир, - деди онахон сўзга чиқиб.

Ҳарбийлар қошида сўзга чиққан М. Хидирзода: - «Оналар учун барча аскарлар бола ҳисобланади. Шунга қарамай, уларнинг зиммасига катта масъулият – Ватан ҳимояси юклатилган. Улар ҳамиша сергак бўлиб, мустақил Тожикистонимиз тинчлиги ва осойишталигини қўриқлайдилар», - деди.

Мазкур тадбир Бирлик ва миллий тотувлик байрамининг 20 йиллигига тайёргарлик доирасида бўлиб ўтди.

Нашавандликка қарши кураш тадбирлари

Қўрғонтепа шаҳрида Хатлон вилояти Нашавандликнинг олдини олиш координацион кенгашининг мажлиси бўлиб ўтди.

Вилоят Соғлиқни сақлаш бошқармаси раҳбарияти жорий йил бошидан буён ўтган вақт мобайнида бажарилган ишлар ҳамда аҳоли ўртасида Соғлом турмуш тарзини шакллантириш марказининг нашавандликнинг олдини олиш бўйича ўтказган тадбирлари  юзасидан ҳисобот берди. 

Кўлоб шаҳри, Шаҳритуз ва Восе ноҳиялари Нашавандликнинг олдини олиш координацион кенгашлари ўз фаолиятлари юзасидан ҳисобот тақдим этишди.

Хатлон вилояти Нашавандликнинг олдини олиш координацион кенгаши котиби Насим Ҳомидов йиғилиш қатнашчиларига ҳисоботлари тингланган кенгашлар фаолиятлари текшируви натижаларини маълум қилди. Аҳоли ўртасида нашавандликнинг олдини олиш тадбирларини яхшилаш зарурати қайд қилиб ўтилди.

Мажлис Тожикистон Республикаси Президенти қошидаги Наркотиклар назорат қилиш агентлиги Хатлон вилояти бошқармаси бошлиғи, Хатлон вилояти Нашавандликнинг олдини олиш координацион кенгаши раисининг ўринбосари Зафар Сайфуллозода бошчилигида бўлиб ўтди.  

Даштижумда халқ ҳунармандчилиги ривожланади

Шамсиддин Шоҳин ноҳиясининг Даштижум қишлоғида Бирлик ва миллий тотувлик байрамининг 20 йиллигини муносиб кутиб олиш ҳамда халқ ҳунармандчилигини ривожлантириш мақсадида қизларга тикувчилик ҳунари ўргатилмоқда.

Даштижумлик 40 нафар қиз маҳоратли тикувчи Гулдаста Муқимовадан бу касб сирларини ўзлаштиришмоқда.

- Қизларга чакан кўйлак ҳамда игна билан тикиш сирларини ўрагатаман, - дейди Гулдаста Муқимова. – Халқ ҳунармандчилигини тиклаш Тожикистон Республикаси Ҳукуматининг мамлакатимизда сайёҳликни ривожлантиришга кўрсатаётган ғамхўрликларидан сўнг янада долзарблик касб этмоқда. Зеро, жаннатмакон юртимизга ташриф буюрган сайёҳлар кўпроқ миллий кийимларимизга қизиқиш билдирадилар.

Айни пайтда Гулдаста Муқимова ва шогирдлари ўзлари тиккан либосларни байрам арафасидаги намойишларга қўйиш мақсадида меҳнат қилишмоқда.

Ўз мухбир.