Тожикистонда Ўзбекистон маданият кунлари тадбири доирасида Ато Муҳаммаджонов номли вилоят мусиқали комедия театрида Ўзбекистон санъаткорлари иштирокида концерт дастури бўлиб ўтди. Бу ҳақда Тожикистон Республикаси Маданият вазирлигидан хабар беришди.

Тадбир бошланишида вилоят раиси Давлатшоҳ Гулмаҳмадзода чиқиш қилди:

- Биз Ўзбекистон билан фақат чегарадош бўлмай, балки халқларимизнинг урф-одати, маданий қадриятларимиз ҳам жуда ўхшашдир. Бизни асрлар давомида ижтимоий, тарихий ва маданий илдизлар боғлаб туради. Халқларимиз азалдан биродар бўлиб, ягона оила сифатида яшаб келаётганлигига тарих гувоҳ…

Хатлон вилояти раиси, шунингдек, икки қардош халқ адабиётлари вакиллари – Ҳазрат Жомий ва Мир Алишер Навоий дўстликларига тўхталиб, бу дўстлик янада сайқал топишидан мамнун эканлигини изҳор этди.

Сўнгра ўзбек санъаткорларининг концерт дастури тадбир қатнашчиларига тақдим этилди ва улкан  завқ-шавқ улашди.

Ёшлар одам савдосига қарши

Норак шаҳрида Тожикистон Республикаси Ҳукумати қошидаги Ёшлар, спорт ва сайёҳлик комитетининг ёшлар билан ишлаш бошқармаси катта мутахассиси Исмоил Шерхонов, давлат ҳокимияти Норак шаҳри ижроия органи бўлимлари бошлиқлари, шаҳар фаоллари ва ёшлари иштирокида жамиятда рўй бераётган кўнгилсиз омиллар, жумладан, одам савдосига қарши кураш юзасидан учрашув бўлиб ўтди.

Масъул шахслар республикамизда одам савдоси, жумладан, гўдаклар савдоси, ёшларнинг бегона ҳаракат ва ғояларга қўшилишлари олдини олиш, экстремизм ва терроризм кўринишларининг зарарли оқибатлари ҳамда Ёшлар йилига бағишланган тадбирларни қўллаб-қувватлаш юзасидан фикр билдиришди. Улар ёшларни билим олиш, ватандўстлик ва бунёдкорликка даъват қилдилар.

Ичимлик суви билан таъминлаш тизимига доир долзарб йиғилиш

Норак шаҳридаги «Сайёра» меҳмонхонасида «Сув – устувор тараққиёт учун» халқаро ўн йиллик амалиёти доирасида ҳамда жамиятда аёллар мавқеини ошириш, айниқса, маҳаллалар даражасида аҳолини ичимлик суви билан таъминлаш масалалари, сув билан таъминлаш тизимида аёлларнинг раҳбарлик мавқеини ошириш мақсадида, Тожикистон Республикаси тоғли минтақаси ижтимоий тараққиётини қўллаб-қувватлаш дастури жамият ташкилоти томонидан «Ичимлик суви тизимини бошқариш ва уни устувор сақлашда аёллар мавқеи» мавзусида йиғилиш бўлиб ўтди. Бу ҳақда давлат ҳокимияти Норак шаҳри ижроия органи Ижтимоий тараққиёт ва жамоатчилик билан алоқалар бўлими мудири Ҳабиба Сафарова хабар берди. 

Йиғилишда «Ичимлик суви тизимини бошқариш ва уни устувор сақлашда аёллар мавқеи» мавзусида Норак шаҳри раиси ўринбосари, шаҳар раиси аппаратининг Ижтимоий тараққиёт ва жамоатчилик билан алоқалар бўлими мудири, қишлоқ жамоатлари котиблари, Далдахурон ва Хожаабдалон маҳаллалари аёллар комитетлари вакиллари чиқиш қилишди.

Тадбир қатнашчилари ҳам бу масалада фойдали маслаҳатлари билан ўртоқлашдилар. 

Баҳорги ҳарбий даъват маъракаси якунланиш арафасида

Бир ойдан ортиқ муддатда давом этаётган ёшларни ҳарбий хизматга даъват қилиш баҳорги маъракаси давомида вилоятда режа 87 фоиз бажарилди. Ўтган ҳафта охиригача бўлган маълумотларга кўра, вилоятнинг 25 шаҳар ва ноҳиялари орасида Кўлоб шаҳри, Н. Хисрав, Ш. Шоҳин, Балжувон ва Мўминобод ноҳияларида баҳорги даъват режаси муддатидан илгари бажарилди. Бу ҳақда Хатлон вилояти ҳарбий комиссариатидан хабар берилди.

Масъул шахсларнинг маълум қилишича, яқин кунларда ёшларнинг баҳорги ҳарбий хизматга даъват маъракаси якунланади.

Инглиз тилига бағишланган тадбир

Хатлон вилояти раиси ўринбосари Махфират Хидирзода ва Буюк Британиянинг Тожикистондаги элчиси Хю Филпотлар Қўрғонтепа шаҳрида ўтказилган Инглиз тили куни тадбирида иштирок этишди.

Ўша куни Қўрғонтепа шаҳридаги болалар мусиқа мактабида мусиқа синфи ўқувчилари иштирокида концерт дастури ўтказилди.

Ато Муҳаммаджонов номли вилоят мусиқали комедия театрида меҳмонлар Вилям Шекспирнинг асарлари юзасидан тайёрланган «Гамлет», «Отелло» ва «Ромео ва Жулетта» саҳначаларини томоша қилишди. Саҳначалар режиссёрлари томошабинларга классикани замонавий нигоҳда кўриш имкониятини беришди.

Инглиз тилини ўрганиш марказида Хю Филпот Инглиз тили кунига бағишланган тадбирда қатнашди.

Ўз мухбир.