Тожикистон Давлат тасвирий санъат ва дизайн институти мамлакатимизда янги ташкил этилган олийгоҳлардан бири ҳисобланади. Унинг ўқитувчилар жамоасида профессору доцентлар, Тожикистон халқ рассомлари, Рўдакий номли Давлат мукофоти лауреатларининг борлиги таълим самарадорлигини ошириш ҳамда студентларнинг ҳам назарий, ҳам амалий жиҳатдан пухта билим эгаси бўлишларига имкон беради.

Матбуот анжумани бошланиши олдидан институт йўлаклари ва аудиториялари деворларига осиб қўйилган талабаларнинг ижод намуналари ҳамда дизайн йўналишида таҳсил олувчи студентларнинг миллий ва ғарб услубида яратилган либослар чизмаларини кўриб, ёшлар ижодига таҳсин айтгинг келади, киши.

-Институтимиз тасвирий санъат ва дизайнга ихтисослашганлиги боис, бизда имтиҳонлар махсус комиссия томонидан қабул  қилинади. Унда ҳар бир талаба ярим йиллик ўқиш давомида яратган асари билан қатнашиб, комиссия аъзолари томонидан баҳоланади,-деди Тожикистон

Давлат тасвирий санъат ва дизайн институти ректори Жамшед Ғанизода журналистлар ҳузурида.

Унга кўра, ўтган йил давомида институт ўқитувчи-ю талабаларининг  яратган тасвирий санъат асарлари халқаро Наврўз, Миллий бирлик байрамлари ва Тожикистон Республикаси давлат мустақиллигининг 25 йиллик юбилейига бағишлаб ўтказилган турли кўргазмаларда намойиш этилган.

- Тожикистон Давлат тасвирий санъат ва дизайн институтида иккита: тасвирий санъат ва дизайн факултетлари бўлиб, уларда 26та ихтисос бўйича мутахассислар тайёрланади. Шу билан бирга,  баъзи ихтисосларга қўшимча тарзда ўқитувчилик мутахассислиги ҳам берилади. Масалан, тасвирий санъат йўналишида ўқийдиган талабалар бир вақтнинг ўзида ўқитувчилик ихтисослигини олиб, ўрта умумтаълим муассасаларида тасвирий санъат фанидан дарс бериш имконини қўлга киритадилар. Бу йил эса, институтимизни биринчи битирувчилар тамомлайди,-дейди Жамшед Ғанизода.

Институтнинг яна бир қулай томони шундаки, бу ерда махсус галерея ташкил этилган бўлиб, унда талабалар ўз ижод намуналарини кўргазмага қўйишлари ҳамда сотишлари мумкин.

Тожикистон Давлат тасвирий санъат ва дизайн институти ўқитувчилари ва талабалари буюртма ишлар олиш-олмаслиги ҳақида тўхталган ректор: -Биз яқинда Ёшлар йили рамзини яратишга буюртма олдик,-деди.- Бундан ташқари студентларимиз ҳам буюртма ишлар олиб туришади.

Зуҳриддин УМАРОВ, "Халқ овози".