- Жорий йилнинг олти ойида солиқ ва бошқа тўланиши шарт бўлган тўловлар режаси 102,1 фоизга бажарилди, - деди Тожикистон Республикаси Ҳукумати қошидаги Солиқ комитети раиси Нусратулло Давлатзода яқинда ўтказилган матбуот конференциясида. – Давлат хазинасига 4 миллиард 466 миллион 300 минг сомоний ўрнига, 4 миллиард 559,1 миллион 100 минг сомоний маблағ тушди.

Солиқ комитети раҳбарининг таъкидлашича, ҳисобот даврида нодавлат ташкилотлар ҳисобидан ижтимоий солиқнинг бажарилмаганлиги асосий сабаби жаҳонда рўй берган молиявий инқирознинг таъсиридир.

- Молиявий инқироз таъсирида солиқ тўловчиларнинг молиявий аҳволи ёмонлашиб, айрим хўжалик субъектларида ишчиларнинг маоши, баъзиларида эса, ходимлар сони ҳам камайганлиги солиқнинг бу тури режаси бажарилмай қолишига олиб келди, - деб таъкидлади Н. Давлатзода.

Ҳисобот даврида нодавлат ташкилотлар ҳисобидан ижтимоий солиқ режаси 96,9 фоизга бажарилган.

Солиқ комитети раҳбарининг маълумотига кўра, жорий йилнинг олти ойида мамлакатимизда 296 минг 122та хўжалик субъекти фаолият юритган.

Шунингдек, матбуот конференцияси жараёнида мобил алоқа компанияларининг солиқ комитети олдидаги қарзлари юзасидан сўз юритилди.

- «Tcell», шунингдек, «Таком» мобил алоқа компаниялари солиқ бўйича қарзларини тўлай бошладилар, - деди Н. Давлатзода. – Шу кунгача «Tcell» мобил алоқа компанияси 56,9 миллион сомоний қарзини тўлади. Компаниянинг умумий қарзи 155,6 миллион сомонийни ташкил этади. Томонлар келишувига кўра, қарзнинг қолган қисми октябр-ноябр ойларигача тўланади. «Таком» мобил алоқа компанияси ҳам ўз қарзларини тўламоқда.

Солиқ комитети раиси Н. Давлатзоданинг таъкидлашича, солиқ тўловчилар интизомли бўлсалар, бундай муаммолар юзага келмайди.

Айни пайтда мамлакат солиқ комитети ходимлари «Мегафон» бренди остида фаолият юритаётган «МЛТ» мобил алоқа компаниясининг 183,5 миллион сомоний солиқни яширганлигини ошкор этишган. Солиқ комитети ва компания масъуллари бу муаммо юзасидан мулоқот олиб боришмоқда.

Нусратулло Давлатзода солиқдан қарздорларнинг энг катталари қайсилар эканлигини таъкидлаб ўтди. Маълум бўлишича, энг катта қарздорлар «Барқи тожик» холдинг компанияси (186 миллион сомоний), «Ресандаи Қўрғонтепа» корхонаси (17 миллион сомоний), «Ангишти Назарайлоқ» корхонаси (8,1 миллион сомоний) ва бошқалар.

- Кейинги пайтлар солиқ тўлашдан катта қарздор корхоналар сони ошиб бормоқда, - деди Н. Давлатзода.

Матбуот конференцияси жараёнида солиқ ундириш ҳамда давлат бюджетини бойитиш муаммоларига кенг тўхталиб ўтилди.

Искандар МАҲМАДАЛИЕВ,

«Халқ овози».