8 май куни мамлакат Президенти Эмомали Раҳмон иштирокида пойтахтнинг Ғалаба боғида Гитлер фашизми устидан қозонилган Ғалабанинг 70 йиллиги муносабати билан ёдгорлик гулханига гулчамбар қўйиш маросими бўлиб ўтди.

Буюк Ғалабанинг 70 йиллигига Душанбе шаҳридаги Ғалаба боғи майдони байрамона тарзда ясатилганди. Мазкур тантанали маросим Давлат бошлиғи Эмомали Раҳмон, Парламент ва Ҳукумат раҳбарияти ва аъзолари, Тожикистонда аккредитацияси бўлган дипломатик вакиллар, уруш ва меҳнат қаҳрамонлари, пойтахт жамоатчилик вакиллари иштирокида бўлиб ўтди. 

Мамлакат Мудофаа вазири Шерали Мирзо Тожикистон Республикаси Президенти, Қуролли кучлар Олий бош қўмондони Эмомали Раҳмонга Душанбе ҳарбий гарнизони қисм ва бўлинмаларининг гулчамбар қўйиш ва ҳарбий парадга тайёрликлари ҳақида ҳисобот берди.

Мамлакат Президенти Эмомали Раҳмон ўз чиқишида Иккинчи жаҳон урушини инсоният тарихидаги энг фожиали урушлардан бири деб атаб, ушбу шафқатсиз курашда мардларча турган ва фашизм устидан ғалаба таъминланишига сезиларли ҳисса қўшган уруш ва меҳнат қаҳрамонлари, мамлакатимиз тинчликсевар халқини чин дилдан табриклади ҳамда ҳар бир тожик хонадонига тинчлигу хотиржамлик, фаровонлик, соғлиқ ва бахту саодат тилади.

300 мингдан зиёд тожикистонликлар бу шафқатсиз урушда мардлигу қаҳрамонлик кўрсатгани, шундан 92 минг нафари кураш майдонида ўзининг фарзандлик бурчини ижро этиш чоғида ҳалок бўлишгани таъкидланди.

Шунингдек, шарафли жангчиларимизнинг Иккинчи жаҳон урушидаги жасорату мардликлари жаҳонда терроризм, экстремизм, миллатчилик ва ирқчилик каби таҳдиду хатарлар кундан-кунга кучайиб бораётган нотинч ва жуда мушкул вазиятда бугунги ва келажак авлод учун ватанпарварлик, мардлик ва Ватанга муҳаббат намунаси ҳисобланиши қайд қилинди.

Иккинчи жаҳон уруши қурбонлари хотирасига ёқилган абадий гулханга гулчамбар қўйилди. 

Биринчилардан бўлиб Тожикистон Республикаси Президенти, мамлакат Қуролли кучлари Олий бош қўмондони Эмомали Раҳмон гулчамбар қўйиб, ўша фожиали уруш қаҳрамонлари ва иштирокчилари хотирасига эҳтиром кўрсатди.

Сўнгра Тожикистон Республикаси Олий Мажлиси Миллий мажлиси ва Намояндалар мажлиси, Тожикистон Республикаси Ҳукумати, Душанбе шаҳри давлат ҳокимияти ижроия органи, уруш ва меҳнат фахрийлари, мамлакат қуролли тузилмалари, Тожикистондаги дипломатик корпус вакиллари, Россия Федерациясининг юртимиздаги элчихонаси ва 201-ҳарбий базаси ҳамда Тожикистон Республикаси ёшлари номидан гулбчамбарлар қўйилди.

Иккинчи жаҳон уруши қурбонлари хотирасига бир дақиқалик сукут билан эҳтиром кўрсатилди.

Уруш қурбонлари хотирасига эҳтиром кўрсатиш маросими Душанбе ҳарбий гарнизони қисм ва бўлинмалари ҳарбий паради билан давом этди. Ҳарбий парадда мамлакат барча ҳарбий қисмлари офицеру аскарлари, жумладан, Мудофаа вазирлиги, Ички ишлар вазирлиги, Миллий хавфсизлик давлат комитети Чегара қўшинлари, Тожикистон Миллий гвардияси, Адлия вазирлиги Жиноий жазони ижро этиш бош бошқармаси, Фавқулодда ҳолатлар ва фуқаролар мудофааси комитети ҳамда Россия Федерациясининг юртимиздаги 201-ҳарбий базаси ҳарбий қисмлари иштирок этишди.

Давлат бошлиғи Эмомали Раҳмон, шунингдек, ўсиб келаётган ёш авлод, уруш ва меҳнат қаҳрамонлари билан очиқ суҳбат ўтказиб, қаҳрамонларга уларнинг урушда кўрсатган жасоратлари ҳамда мамлакат ўсиб келаётган ёш авлодини ватанпарварлик, мардлик ва жасурлик руҳида тарбиялаганликлари учун миннатдорчилик билдирди.

«Ховар» ТМАА.