Олий лига жамоалари ўртасида мамлакатнинг тўрт карра чемпиони –пойтахтнинг «Истиқлол» жамоаси нуфузи жиҳатдан қитъа клублари ўртасида иккинчи саналган «Осиё футбол конфедерацияси кубоги-2016» турнири доирасидаги илк учрашувини ўтказди.

Мубин Эргашев шогирдлари гуруҳ босқичининг 1-турида Иорданиянинг «Ал-Файсали» жамоаси тўптепарларини қабул қилишди.

Қарама-қаршилик тенг курашлар асосида ўтди ва ҳисобни очиш имкониятлари бўлишига қарамай, рақиблар бир-бирларининг дарвозаларини «забт» этишолмади.

Шундай қилиб, беллашув нурсиз дуранг-0:0 ҳисобида якун топди.

«Истиқлол» гуруҳ саралаш босқичининг 2-турида Ливаннинг «Триполи» клубига қарши майдонга тушади.

Эслатиб ўтиш жоизки, истиқлолчилар ўтган мавсумда ушбу турнирнинг финал учрашувида қатнашишган эди.

МАРКАЗИЙ МИНТАҚА ФИНАЛЧИЛАРИ

«Тожикистон футбол федерацияси кубоги-2016» турнирининг минтақавий босқичи ҳам ниҳоясига етиб бормоқда.

Марказий минтақа – Душанбе шаҳрида бўлиб ўтган турнирнинг ғолиблари аниқланиб, улар гуруҳ босқичида иштирок этиш ҳуқуқини берувчи йўлланмани қўлга киритдилар.

Бу жамоалар Турсунзода ва Ваҳдат шаҳарларининг «Регар-ТадАЗ» ҳамда «Хайр», шунингдек, пойтахтнинг «Истиқлол», ЦСКА «Памир» клубларидир.

Энди навбатдаги гуруҳ босқичида «Истиқлол», ЦСКА «Памир» «А», «Регар-ТадАЗ», «Хайр» жамоалари эса, «Б» квартетларида иштирок этади.

Шимолий ва жанубий минтақалар – Суғд ва Хатлон вилоятлари мусобақаларининг ғолиблари бу тўртликларни тўлдиришади.

-------------    Ўқ узиш  -------------

ЎСМИР КАМОНЧИЛАР ТУРНИРИ

Яқинда Душанбе шаҳрида камондан ўқ узиш бўйича 2001-2003 йилларда туғилган ўсмирлар ўртасида республика мусобақалари тугади.

Турнирнинг ўғил болалараро беллашувларида Абдуллохон Иброҳимов, Шоҳруҳ Жабборов, Амиржон Мўминов ва қизлар ўртасида Дилноз Шарипова, Нафиса Расулова, Амина Азизовалар ғолиб чиқишди.

Мусобақада зафар қучганлар март ойида Россия Федерациясининг Ёқутистон автоном республикаси бош шаҳрида ўтказилиши режалаштирилган «Осиё болалари» турнирида қатнашишади.

Бу мусобақалар ўсмирларимиз учун 2018 йилда Аргентинанинг Буэнос-Айрес шаҳрида ўтказиладиган ёшлар олимпиада ўйинлари халқаро турнирига ҳозирлик кўриш доирасидаги ўқув-машғулотлари ролини бажаради.

 

=====    Жаҳонда    =====

-------------    Сайлов    -------------

ФИФАНИНГ ЯНГИ ПРЕЗИДЕНТИ

Халқаро футбол ассоциациялари федерацияси (ФИФА)нинг Швейцариядаги штаб-квартирасида дунё футболи ташкилотининг президенти лавозими учун сайлов бўлиб ўтди.

ФИФА президентлиги сайловида беш нафар номзод раҳбарлик курсиси учун кураш олиб боришди.

Сайлов натижаларига кўра, ижтимоий келиб чиқиши италиялик бўлган Швейцария фуқароси Жанни Инфантино халқаро футбол ташкилоти президенти этиб сайланди.

Унинг номзодини қўллаб-қувватлаб, ФИФАга аъзо 115та давлат вакиллари овоз беришди.

Нуфузли футбол ташкилотини узоқ вақт бошқариб келган Зепп Блаттер ўтган йили бу лавозимга қайта сайланган эди. Аммо у ФИФАдаги порахўрликлар билан боғлиқ жанжаллар туфайли истеъфо беришга мажбур бўлганди.

-------------    Футбол    -------------

РОССИЯЛИКЛАР – МАЙДОН ТАШҚАРИСИДА

Футбол бўйича «Кўҳна дунё» клублари ўртасидаги Европа лигаси турнирининг 1/16 финал босқичи мусобақалари охирига етди.

Унда Россия Федерацияси шарафини ҳимоя қилаётган Краснодар ўлкасининг «Краснодар» ва Москва шаҳрининг «Локомотив» клублари курашни давом эттириш имкониятини қўлдан беришди.

Такрорий ўйинда краснодарликлар Чехиянинг «Спарта» жамоасини қабул қилиб, йирик - 0:3 (0:1) ҳисобиди ютқазиб қўйишди.

Биринчи учрашувда Туркиянинг «Фенербахче» клубидан 2:0 ҳисобида мағлуб бўлган «темир йўлчилар» ўз майдонларида дуранг (1:1) натижа қайд этиш билан чекландилар.

Эндиликда Санкт-Петербургнинг «Зенит» жамоаси Европа кубокларининг Чемпионлар лигаси мусобақаларида Россия Федерацияси байроғи остида чиқиш қиладиган ягона жамоа бўлиб қолди.

-------------    Теннис    -------------

ЁШ ҒОЛИБЛАР БЕЛЛАШУВИ

Қатар давлати пойтахти Доха шаҳрида теннис бўйича ёшлар ўртасидаги халқаро турнирлар ғолибларининг «Катта дубулға» туркумига кирувчи анъанавий турнири ниҳоясига етди.

Унинг ҳал қилувчи финал босқичида испаниялик Карли Суарес-Наварро ва латвиялик Елена Остапенколар кортга чиқишди.

Беллашувни юқори суръатда бошлаган Елена Остапенко биринчи қисмни 6:1 ҳисобидаги устунлик билан якунлади.

Қолган иккинчи қисмда сусткашликка йўл қўйган латвиялик теннисчи 4:6, 4:6 ҳисобида енгилди.

Шундан сўнг, испаниялик ёш теннисчи Карли Суарес-Наварро турнирнинг бош совринини қўлга киритди.

«Халқ овози»нинг спорт шарҳловчиси.