Эртадан кейин, яъни 18 август куни Индонезиянинг Жакарта ҳамда Палембанг шаҳарларида «сариқ қитъа»нинг энг нуфузли турнири - XVIII «Осиё ўйинлари- 2018» мусобақаларига старт берилади.

Мазкур мусобақаларда Тожикистоннинг 100 нафар вакили, жумладан, 80 нафар спортчи иштирок этади.

Беллашувлар спортнинг 40 тури бўйича ўтказилади. Юртдошларимиз эса, шуларнинг 15тасида куч синашишади.

Эслатиб ўтамиз, Тожикистонлик спортчилар 1994 йилдан буён, Осиё ўйинлари мусобақаларида қатнашиб келишади. Шу давр мобайнида намояндаларимиз ўз жамғармаларида 21та медал тўплашган, шулардан олтитаси олтин медаллардир.

 

---------   Футбол   ---------

ДУШАНБЕЛИКЛАР – ИЛК ЧЕМПИОНАТ ҒОЛИБИ

Футбол бўйича аёллар ўртасида биринчи Тожикистон чемпионати турнири ўз якунига етди.

Чемпионат ғолиби тақдирини ҳал қилувчи учрашув Бохтар шаҳридаги «Пахтакор» стадионида бўлиб ўтди.

Унда чемпионлик унвони учун Душанбенинг «Зебонисо» ва «Хатлон» жамоалари майдонга тушди.

Қизғин кечган чемпионлик курашида дуранг - 1:1 ҳисоби қайд этилди. Ва «Зебонисо» клубига чемпионат ғолиблиги шарафини келтирди.

Мавсумда рақиблар дарвозаларини 16 марта аниқ нишонга ола билган «Хатлон» жамоаси аъзоси Лайло Ҳалимова мамлакат биринчилигининг тўпурари, деб тан олинди.

 

---------   Сув спорти   ---------

НОҲИЯДА ЭШКАК ЭШИШ РИВОЖЛАНАДИ

Суғд вилоятининг Бобожон Ғафуров ноҳияси Ёшлар билан ишлаш ва спорт бўлимининг ташаббуси билан Спортчилар куни ҳамда Сайёҳлик ва халқ ҳунармандчилигини ривожлантириш йилига бағишлаб, эшкак эшиш бўйича ноҳия очиқ турнири ўтказилди.

Иштирокчилар К-1, С-1 масофалари бўйича 200, 500, 1000 метрга эшкак эшишда ўзаро беллашдилар.

Ғолиблар давлат ҳокимияти Бобожон Ғафуров ноҳияси ижроия органи Ёшлар билан ишлаш ва спорт бўлимининг медал ва эсдалик совғалари билан тақдирландилар.

Очиқ турнирни ўтказишдан мақсад: ноҳияда сув спорти турларини равнақ топтиришга қаратилган.

 

======   Жаҳонда   ======

---------   Бокс   ---------

ЖАНГНИНГ САНАСИ ВА МАКОНИ МАЪЛУМ

Ўрта вазнли спортчилар орасида касбий бокснинг WBO (Бутунжаҳон боксчилар ташкилоти) йўналиши бўйича жаҳон чемпиони Билли Жо Сандерс чемпионликка даъвогар Деметриус Андрейдга қарши кечадиган жангда ўз чемпионлик камарини ҳимоя қилади.

Муштлашувни жорий йилнинг 20 октябрида Америка Қўшма Штатларининг Бостон шаҳрида ўтказиш режалаштирилди.

Шунингдек, бокс оқшоми жараёнида WBА (Бутунжаҳон боксчилар ассоциацияси), IBF (Халқаро бокс федерацияси) бўйича енгил вазнли боксчилар ўртасида ҳам чемпионлик беллашуви ўтказилади. Унда амалдаги жаҳон чемпиони Кети Тэйлор ва чемпионликка даъвогар Синди Серранолар рингга кўтарилишади.

 

---------   Футбол   ---------

БОШ СОВРИННИ «ТОТТЕНХЭМ» ОЛДИ

Испаниянинг Мадрид шаҳрида футбол бўйича халқаро Чемпионлар кубоги турнири ниҳоясига етди.

Мусобақанинг сўнгги учрашувида Италиянинг «Интер» ва майдон эгалари «Атлетико» жамоалари «яшил майдон»га тушди. Тенг курашлар асосида ўтган ўйинда кичик - 1:0 ҳисоби қайд этилди.

Ягона голни италияликлар вакили Лаутаро Мартинес биринчи қисмнинг 31-дақиқасида ўз номига ёзиб қўйди.

Бош совринни эса, Англиянинг «Тоттенхэм» клуби ўзи билан олиб кетди. Халқаро Чемпионлар кубоги мавсумолди турнири ҳар йили дунё мамлакатлари чемпионлари ўртасида ўтказилади.

 

«Халқ овози»нинг спорт шарҳловчиси.