Хатлон вилояти раисининг Кўлоб шаҳридаги қароргоҳида вилоят раиси ўринбосари Махфират Хидирзода Кўлоб минтақаси ташкилот ва муассасаларида обуна маъракасининг жараёни ҳақида иш кенгаши ўтказди. Йиғилишда обуна маъракаси жараёни таҳлил қилиниб, атрофлича ўрганиб чиқилди. Ташкилот ва муассасалар масъуллари жорий йилги обуна маъракаси кўнгилдагидек кечаётганлиги ва муштарийлар ўзлари севган газета-журналларга обуна

бўлишларини изҳор этишди.

Кенгашда «Обуна - 2018» маъракасида йўл қўйилган айрим камчиликлар ошкор этилди. Жумладан, Кўлоб минтақаси Уруш ва меҳнат фахрийлари раиси, 95 ёшли Мирзо Бекматов олти ойдан буён ўзининг севимли нашрияси – «Ветеран»ни ололмаётганлигидан нолиди. Кўлоб шаҳри почтаси масъуллари мазкур муаммога зудлик билан ечим топишга ваъда беришди.  

 

Хавфли хасталикка қарши

Вилоят Соғлом турмуш тарзини шакллантириш маркази мутахассис ва ходимлари марказнинг репродуктив саломатликни тиклаш, инсон иммун етишмовчилиги вируси (ИИЕВ) хасталигининг олдини олиш режасига кўра, Данғара ноҳиясига сафар қилдилар. Улар Данғара ноҳияси биринчи ёрдам тиббий-санитария муассасалари, маориф, маданият, ёшлар ва спорт ишлари бўлими, дин комитети, аёллар ва оила билан ишлаш бўлими ходимлари билан учрашиб, инсон иммун етишмовчилиги вируси хасталиги ва бу касалликни юқтиришнинг олдини олиш ҳамда нашавандлик юзасидан суҳбатлар уюштиришди.

Шунингдек, марказ мутахассислари вилоят телевидениеси орқали «Соғлом турмуш тарзи» кўрсатувида чиқиш қилдилар. Б. Воҳидов номидаги вилоят клиникаси мутахассислари «А» гепатити касаллиги ва унинг олдини олиш мавзусида нутқ сўзлашди.

 

Қишлоқда халқ ҳунармандчилиги маҳсулотлари намойиши

Тожикистон Халқ демократик партияси Кўлоб шаҳри ижроия комитетининг ташаббуси билан Даҳана қишлоқ жамоати Чинор қишлоғида халқ ҳунармандчилиги маҳсулотлари намойиши ўтказилди. Тадбир жараёнида қишлоқ аҳли қўл ҳунарлари маҳсулотлари ва ўзлари тайёрлаган миллий таомларни намойишга қўйишди.

Тожикистон Халқ демократик партияси Кўлоб шаҳри ижроия комитети раиси Саъбагул Валиева тадбир ташкилотчиларига миннатдорчилик билдирди.

- Сайёҳлик ва халқ ҳунармандчилигини ривожлантириш йилида миллий қадриятларимиз, аждодий удумларга эҳтиром кўрсатиш, ўзлигимизни англаш ҳамда ватандўстлик ҳиссини ривожлантириш мақсадида шундай тадбирлар уюштириш яхши анъанадир, - деди С. Валиева. – Биз мазкур тадбирларни уюштириб, Тинчлик ва миллий бирлик асосчиси – Миллат пешвоси, Тожикистон Республикаси Президенти муҳтарам Эмомали Раҳмоннинг кўрсатма ва топшириқларини қўллаб-қувватлаймиз.

Тадбир қишлоқ аҳлининг маданий намойиши билан якунланди.

 

Вилоят раиси ўринбосарининг кўчма қабули

Хатлон вилояти раиси ўринбосари Махфират Хидирзода Кўлоб ноҳияси Зираки қишлоқ жамоатига ташриф буюриб, бу ерда ариза ва шикоят билан мурожаат этган фуқароларни қабул қилди. Фуқароларнинг кўпчилиги йўлларнинг ёмон ҳолати, электроэнергия узатиш симчўпларининг чириганлиги, айрим мактабларнинг таъмирталаблиги каби турмуш муаммолари юзасидан шикоят қилишди. Барча шикоятларни тинглаган вилоят раиси ўринбосари улар ечимини тегишли масъул шахсларга юклаб, ижросини назорат остига олишини таъкидлади.

- Айрим муаммолар ечимини, жумладан, йўлларнинг жорий таъмирини маҳаллий тадбиркорларни жалб этган ҳолда топиш мумкин, - деди Зираки қишлоғи маҳалла раиси Эмомназар Шарифов. – Бунинг учун фаоллар тадбиркорлар ўртасида тушунтириш ишларини йўлга қўйиши лозим.

Йиғилиш қатнашчилари Зираки қишлоқ жамоати аҳолиси Тожикистон Республикаси Давлат мустақиллиги 30 йиллик юбилейини муносиб кутиб олишга тайёр эканликларини изҳор этишди.

 

Санъаткорларнинг ижодий сафари

Бохтар шаҳридаги Ато Муҳаммаджонов номли вилоят мусиқа ва мазҳака театри артистлари яқинда ижодий сафар билан қўшни Қирғизистон Республикасида ўтказилган фестивалга боришди. Санъаткорлар у ерга Чингиз Айтматовнинг «Қиёмат» асари юзасидан Парвиз Ражабзода саҳналаштирган спектаклни олиб боришди.

Қувонарлиси шундаки, қирғиз томошабинлари ва жюри аъзолари хатлонлик санъаткорларнинг спектаклини яхши қабул қилишди. Театр актёрлари фестивал якунида Қирғизистон Республикаси Маданият, ахборот ва сайёҳлик вазирилигининг иккита мукофоти ва битта махсус дипломи билан тақдирланишди.

Мазкур фестивал таниқли ёзувчи Чингиз Айтматовнинг 90 йиллигига бағишлаб уюштирилганди. Тожикистон Халқ артисти Аловуддин Абдуллоев фестивалда «Энг яхши эркак роли», театр актёри Қурбонмуҳаммад Шукуров эса, иккинчи даражали «Энг яхши эркак роли» мукофотларини қўлга киритишди.

 

Ўз мухбир.