Сизга кўп битишган турфа «шиғир»лар,

Ғоратдир қофия  захиралари.

Энди қоғоз-қалам  беҳол шитирлар,

Қайдасиз, Кумушнинг набиралари?

 

Гарчанд атроф тўла қаламқош қизлар,

Оқбилак, мовийкўз, малласоч қизлар,

Аксари бевафо, бағритош қизлар...

Қайдасиз, Кумушнинг набиралари.

 

Сизни Марғилонми ё Шошдан топай?

Тополмасам, айтинг, қай кентга чопай?

Ню-Йорк ё Истанбул, Масков ё Дубай?

Қайдасиз, Кумушнинг набиралари?

 

Бугун меҳр танқис, муҳаббат арзон,

Беномус Ҳомидлар кезмоқда ҳарён,

Отабек  бобонгиз руҳи ҳам сарсон,

Қайдасиз, Кумушнинг набиралари?

 

Покиза бир ишқни кутиб чарчадим,

Кўксим жафоларга тутиб чарчадим,

«Фейсбук», «Одно»ларни титиб чарчадим,

Қайдасиз, Кумушнинг набиралари?

 

Ахир, кўнглим қолди ночор кўнгулдан,

Нетай, кўнгил тўлмас, ҳеч битта гулдан?

Қидириб кўрсамми, энди «Гугл»дан?

Қайдасиз, Кумушнинг набиралари?

 

Излаб юрганимда чекиб нолалар,

Устимдан кулишди, беғам болалар:

Ҳожатинг чиқарар Жаннат холалар...

Қайдасиз, Кумушнинг набиралари?

 

Тўлиб кетганида бағрим хунларга,

Кунларим уланди бедор тунларга,

Оҳ, қайтиб бўлсайди Ўткан кунларга,

Қайдасиз, Кумушнинг набиралари?..

 

Рустамжон Жабборов.