Тожикистон истиқлолияти - 25 йил

 Шеъримсан - Ватан...

 Оппоқ капалакнинг гулисан - Ватан,

Сайроқи қалдирғоч инисан - Ватан.

Шамолдек елгувчи учқур отимсан,

Асалариларнинг болисан - Ватан!

 

Тоғнинг чўққисида турган бургутсан,

Яйраб куйлаётган шўх булбулимсан.

Оллоҳим яратган нурли йўлимсан,

Ифорли гулимсан, гулимсан -Ватан.

 

Беғубор боласан, қадами қутлуғ,

Дилимда ноласан, ўчоқдаги чўғ.

Мен севган онамсан, онамсан - Ватан,

Энг гўзал достоним, шеъримсан - Ватан.

 

Оҳудек ёқимли сирли бир сўзсан,

Узугимга тушган бир нурли кўзсан.

Инсонга аталган сен нону тузсан,

Ватан, Ватан, Ватан!

 

САВОЛ

Сўқир дунё инсонни алдаб,

Етаклайсан, айтгин қаерга?

Синовингдан турибман титраб,

Нима ёзиб қўйдинг тақдирга?

Кўзларимдан оқди қанча ёш,

Тугаб қолди: сабр ва бардош.

Сўқир дунё, битта сўз айтгин,

Мен ўзимни ишонай кимга?

Дўст деганим отди менга тош,

Яшаяпман ўзимни излаб.

Сўқир дунё, битта сўз айтгин,

Мен ўзимни ишонай кимга?

Умид мени қўлимдан ушлаб,

Етаклайди дунё қаерга?

Орзулар - кўп, умидлар - буюк,

Мен ишондим дўстлар, Оллоҳга…

 

МУҲАББАТ

 

Куйдирди, кул қилди дилимни,

Муҳаббат, муҳаббат, муҳаббат.

Истамас у аччиқ ўлимни,

Муҳаббат, муҳаббат, муҳаббат.

Кимларга у омад, танҳо - бахт,

Кимларга у аччиқ тақдирдир.

Муҳаббат аслида ёруғ нур,

Инсонга аталган бир қисмат.

Муҳаббат бир далли девона,

Кимларга бу туйғу бегона.

Севги - бу аслида афсона,

Муҳаббат эски дард, эски дард.

Муҳаббат соф туйғу кимгадир,

Муҳаббат кимларга бегона

Дилига қувончлар беролса,

Муҳаббат нурли бахт, нурли бахт…

 

Мусаллама Қаршиева,

Турсунзода шаҳри.