Қатраларда қуёш акси кўринганда,

Мен сени эслайман, мунис онажон.

Қўшиқ айтиб фасли баҳор келганда,

Мен сени қумсайман, мунис онажон.

Гоҳида нодонлар мазах қилганда,

Хаёлим  қатида насиҳатларинг.

Гоҳида ўзгалар таъна қилганда,

Менга йўл кўрсатар маслаҳатларинг.

Фасли баҳор келди, ўрик гуллади,

Лекин сен келмадинг, мунис онажон.

Кўрдим адирларда лолалар кулди,

Сен қайтиб келмадинг, жоним онажон.

 

***

Ҳаёт йўлагида мулзам қолдим мен,

Ҳолим сўрамадинг, бўлмадинг дўстим.

Рақиблар жилмайди, сўз айтолмадим,

Ҳиссиз бир тош бўлиб қолавердинг сен.

Ўкинчлар қалбимни ўртаган лаҳза,

Ўзгача қўшиқчи, дўсту ёр бўлдинг.

Ҳамдардим, ҳамроҳим шеърият бўлди,

Дардкаш шеъриятдан жудо бўлмай мен.

 

***

Интизорман, сени кутаман,

Баҳорлардан сўрайман сени.

Юлдузларга сокин боқаман,

Қайда дебон, қалбим дилбари.

 

Ёшлигимни такрор эслайман,

Ўн саккизга қайтгим келади.

Навбаҳорни - сени эслаб мен,

Такрор қўшиқ айтгим келади.

 

Келгин қайтиб, соғиндим сени,

Дилда армон бўлиб қолмагин.

Унутмагин, жонгинам мени,

Фасли баҳор бўлиб келгин сен.

 

ХАЙРИНИСОга

 

Мушкул лаҳзаларда қўлладинг мени,

Келажак тонглардан қилдинг умидвор.

Бахтим юлдузи деб, атагум сени,

Ўзинг ҳам дилбарсан мисли навбаҳор.

 

Рақиблар жилмайди, бўлдинг тарафдор,

Қалбимга ёруғлик олиб келдинг сен.

Омадинг тилагум, бўлиб миннатдор,

Қалбимда вафодор - ўзингсан дилдор.

ТЎРТЛИКЛАР

 

Яхши бир қўшиқ бор, оти эзгулик,

Қалбингга ёруғлик олиб киради.

Ҳамдаминг бўлади бу лаҳза шодлик,

Ёнингда ҳақиқат кулиб туради.

 

***

Садолардан кўнглим умидвор,

Энтикади, сокин кутади.

Келарми деб, нозанин дилдор,

Интиқ кўзим йўлга боқади.

 

Ибодат Умурзоқова,

Душанбе шаҳри.